دردشة طفلان و روبية

شفت هالدردشه في جريدة الوسط البحرينيه
وعجبتني ..
وقلت بنقلها لكم
أتمني أن تعجبكم ..

دردشة طفلان وروبية

* عندك روبية؟ * إيه، بس ما بعطيك إياها؟ حقوي؟ * تذكر يوم انروح الحديقة قبل يومين ما أدري عشرة أيام، اشتريت ليك نفيش ولا عطيتني، أقول ليك عطني أنا صديقك، قلت ليي مانا، قلت ليك بخاصمك قلت ليي خاصمني عادي، قلت ليك ترى بطلع من الفريق مال الكورة قلت ليي بروحك ما تعرف تلعب، المهم ما عطيتني، والحين جاي تبغي من عندي روبية، ما بعطيك.

أفا، أنا صديقك، عطني إياها عاد.
* ما ميش، مانا عاطنك.
ترى بخاصمك؟
* ما تقدر اتخاصمني، لأنك إذا خاصمتني شلون بتحصل الروبية من عندي؟ يعني ما بتخصامني.
انزين ما بخاصمك بس عطني إياها.
* انت حقوي تبغاها صحي؟
أنا صراحة عطشان حدي وابغي أشتري ليي غرشة ماي صحة من البرادة قبل لا تبند عليهم الكهربا.
* ويش دراك بتبند عليهم الكهربا؟
انزين احنا البارحة في البيت بندت علينا الكهربا مرة وحدة، اتصدق كل مكان رجعت ليه الكرباء إلا المطبخ إلي فيه الثلاجة، جنها بلعناد يعني، حتى المخزن إلي أخلي فيه كواطي المعدن رجعت ليه الكهربا، بس المطبخ ما فيه، أنا كنت عطشان من البارحة لكن ويش أسوي الماي صار حار ولا شربت ليي ماي بارد عدل.
* انزين جان خديت من أمك روبية ورحت اشتريت ماي من البرادة.
أمي من البارحة حمقانة للحين، تقول لودام كله اخترب علينا ولازم ناخذ اودام جديد ألحين، أنا صراحة خفت أروح أكلمها وتستحمق واطلع حرقية الكهربا فيي أنا.
* انزين عجل أنا بعد ما بقدر أعطيك الروبية.
ليش؟
* أخاف تبند علينا الكهربا الليلة وبعدين يصير الماي حار وأظل عطشان.
لا انتون عادي ما بتبند عليكم.
* ليش يعني؟
أنا بقول ليك، تدري البارحة حقوي بندت علينا الكهربا؟ البارحة أنا كنت ألعب بلي ستيشن في حجرتي، أمي قالت ليي لا تلعب واجد وأنا ما طاوعتها ولعبت البارحة، اتصدق يمكن لأني طولت في اللعب خلصت الكهربا مالت البيت، تعرف انت بعد، أكيد لكل بيت في كهربا محددة، يعني نفس البتاري بالضبط، أنا أعرف إني أنا السبب لكن صراحة خفت أقول لأمي وبعدين تضربني.
* بل، يعني أنا بعد لازم أحاسب، لأني أقعد اطالع سبيس تون واجد ولا أحاسب، أشوف أمي تستحمق عليي إذا تشوفني أقعد واجد أطالع تلفزيون.
انزين، الحين ويش بتعطيني روبية لو لا؟
* بعطيك إياها، صراحة عورت أفادي.
وأنا مرة ثانية بعطيك نفيش إذا رحنا الحديقة.
* إي جذي عدل، ألحين احنا صدق أصدقاء.

تحياتي:وردة أمل